Glusputuloj
Svingaraneoj
Araneoj de La Gomera
Ĝenerale pri araneoj

 

Antaŭ kelka tempo mi trovis en la ĝardeno rimarkindan araneon. Kun siaj flavaj kaj nigraj transversaj strioj ĝi iom similis vespon. Mi jam sciis ĝian sciencan nomon, sed volis scii, kie ĝi ankoraŭ aperas alie. Do ek al interreto! Tiel mi malkovris retejon tre plaĉan al mi, klare strukturitan, ilustritan per belegaj fotoj kaj kun teksto klariganta tion, kio interesis min jam delonge. La teksto ekzistis ankaŭ en la angla sed bedaŭrinde ne en Esperanto. Ĉu mi aŭdacus ... Kial ne? Mi sendis mesaĝeton al la aŭtoro kun mia opinio pri lia retejo kaj proponis sendi Esperantan tradukon de la teksto; ... revenis afabla respondo pozitiva de Ed!

La tradukado kaj enretigo iris glate kun afabla helpo de Ed, interalie por surekranigi la ĉapelitajn literojn.

Ekde tiam ni estadas en kontakto kaj pliaj interesaj retejoj ekhavas Esperantan version. Trakado montras, ke Esperantistoj el ĉiuj partoj de la mondo ankaŭ interesiĝas pri tiuj misteraj monstretoj plejofte neatendite renkontitaj ĉie sur la tero.

Dum momento supozu, ke vi spektas televidon. Jen grandega novaĵo: spacesplorilo ĵus malkovris vivaĵojn sur alia astro. Scivolege vi ekaŭskultas streĉe.

Tia estas mia sento legante pri tiuj kaj aliaj mondoj ĉirkaŭ ni, pri kiuj la plejmulto neniel interesiĝas, bedaŭrinde male: la mondo de sovaĝaj plantoj ofte konsideratas kiel fiherboj. Insektoj kaj araneoj laŭ ili apartenas al fibestoj frakasendaj tuj. Tamen evidentas, ke tiuj estaĵoj ĉiuj havas problemojn similajn al la niaj. Ankaŭ ili nutru sin, renkontiĝas kun aliaj estaĵoj, samspeciuloj malamikaj aŭ amikaj, proliferas, siajn idojn zorgas jes aŭ ne, mortas, ... reaperas. Ĉiu besteto signifas por mi renkontiĝon kun mistera mondo. Kiel ĝi solvas siajn problemojn, tio interesas min, tial la paĝojn de Ed kun plezuro mi tradukis.

____

Leo de Cooman, marto en 2006