Post la malapero de la dinosaŭroj antaŭ 65 milionoj da jaroj, la mamuloj,
kiuj ĝis tiam estis nur rat-similaj marĝenuloj, komencis preni la rolojn kiujn
la dinosaŭroj antaŭe okupis. Ili evoluis por ekspluati novajn mediojn kaj
vivmanierojn, kaj kiel grupo fariĝis tre diversa. Dum la paso de milionoj da
jaroj, multaj strangaj bestoj aperis kaj malaperis.
Mi sekvis la vojon de la ekspozicio de ĉambro al ĉambro. Kiam mi eniris iun
ĉambron, mi miregis. Antaŭ mi estis skeleto de grandega besto. Mi unua penso
estis "dinosaŭro", sed ne, tio estis mamulo: la indrikoterio (Scienca nomo:
Indricotherium).
Pri la origino de la nomo: therium estas greka radiko kiu signifas
"besto". Indrik estas mita besto de Rusa folkloro. Laŭ la mito, la
Indriko estis Lordo de la Animaloj. Tio estas sufiĉe taŭga nomo por la plej
granda mamulo kiu iam ajn paŝis sur tero. Tamen la mita Indriko havis kornon,
kaj la indrikoterio ne havis. Baluchitherium kompreneble signifas
"Besto de Baluĉistano". Pri la signifo de Paraceratherium, mi ne
certas.
La indrikoterio vivis antaŭ proksimume 30 milionoj da jaroj, en la regionoj
de Pakistano, Mongolio, kaj Ĉinio. Ĝi probable manĝis foliojn de arboj.
Laŭ paleontologoj, la indrikoterio atingis altecon de 5.5 metroj ĉe la
ŝultroj. Antaŭe oni taksis ĝian pezon je 30 metraj tunoj, sed nun ekspertoj
kredas ke ĝi estis multe pli svelta, inter 10 kaj 15 metraj tunoj. Por
komparo, averaĝa afrika elefanto atingas 3.2 metrojn ĉe la ŝultroj, kaj pezon
de 6 tunoj. Mi mem altas 1.78 metrojn, do la indrikoterio estis tri fojojn pli
alta ol mi. Ĝi estis, laŭ nuna scio, la plej granda tera mamulo kiu iam ajn
vivis.
Angla paleontologo, C. Forster-Kuper (C. Forster
Cooper) malkovris la unuajn fosiliojn de indrikoterio en 1910, en Baluĉistano,
provinco de Pakistano. Diversaj paleontologoj elektis diversajn nomojn por la
bestego. Nuntempe la nomo Indricotherium ŝajnas esti plej akceptata,
sed oni ankaŭ ofte vidas Baluchitherium aŭ Paraceratherium.
klaso: Mammalia
ordo: Perissodactyla
familio: Hydracodontidae
genro: Indricotherium
specio: transouralicum
Perissodactyla signifas
malparhufulojn, tio estas, mamuloj kiuj havas malparan nombron da diĝitoj
(piedfingroj). Indrikoterio havis tri diĝitojn po piedo. La ordo inkluzivas
modernajn ĉevalojn, tapirojn, kaj rinocerojn. La indrikoterio estis fakte
parenco de la rinocero. En desegnoj kaj modeloj de la besto, ĝi aspektas kiel
longkola senkorna rinocero.
januaro 2000
indriko@yahoo.com
http://purl.oclc.org/net/klivo/